Saga Of "Too Kool"

TOO kool too kool
lef' im tool
but im still teck a chance
an trod guh de dance

too kool too kool wear im kriss suit
an' im bran new boot guh a de dance
too kool did a duh a round' de wirl
im neva knoo it was scarcha girl
im lite a spliff
an teck a wiff
wan de tune dum im neva leggo har han'
disyah bullet neva ina im plan

too kool too kool
lef' im tool
but im still teck a chance
an trod guh de dance

too kool run to de wall
but yuh knoo de wall was too tall
all de coman dem start to bawl
it was a dre'd dre'd seen in de dance 'all

de musik stap play
a 'ear de d.j. say
"everyday move outa de way
wi naw play nuh more musik disyah day
an yuh betta micase
cause wen de beast dem com all afi chase"

too kool too kool
lef' im tool
but im still teck a chance
an trod guh de dance

it was jus five minutes wen wi ear de sirens
a now de oman dem start to scream
everyone seh too kool de'd
cause de bullet lick im ina im head

too kool was dung
kurl up on de grung
still a blow bre't'
im neva de'd yet

wi tink wi ear a nadda shat
but it was som one kick ova de pat
de beast did seh im a count ten
an every man afi fine im den

yuh knoo de wall did meck fram brick
but wen de beast dem start fire lick
all yuh coulda si was too bamboo stick

now everyone gwan
an lef de lawn
too kool lay dung sprawl ina de mud
all yuh coulda si was pure blood

too kool keep asession lass nite
a same way man com bruck fite
a knoo a nadda session a keep nex' lite
an a bet yuh any ting de crowd a guh tite

Return to Outcry