Old Cut Bruk

great britain great britain
yuh can si
dat yuh domination is history
yuh greatness cease
yuh colonies decrease
de seed yuh sow get rotten
now yuh affi start use dem baton
inna landan
inna birminam
inna brixton
yuh subjects naw teck nuh more
disyah cut nuh ave nuh cure fi sure
dem a guh bruk dung yuh dor

de soun gawn out
riots all about
now yuh subjects tine ascom
no more slaves in de sun
yuh open old cut
now de cut bus
anuh blood a run... a pus

her majesties subjects on de rampage
dem bruk out a dem cage
now yuh caw hide
dem already inside

now yuh call fi peace an calm
but is all a it de yout dem want
yuh open old cut
now de cut bus
anuh blood a run... a pus

prime ministers beware
yuh subjects nuh care
jolly old inglan inna mess
bobby on bicycles put to de test
how many youts yuh tink yuh can arrest

inna landan
inna birminam
inna brixton
tings get rough
youts naw bluff
betta get som more hancuff

two decade is a very long time
banna boat on de decline
yuh cup of tea is gettin cold
yuh greatness is growin old
no more stories to be told

yes de youts dem com of age
now dem turnin a new page
yuh open old cut
now de cut bus
anuh blood a run... a pus

big man bold yuh door
youts inna inglan aguh riot some more

Back to The Mystery Unfolds