Bun Dung Babylon

yuh tink a suh it aguh guh all de wile
yu use wi everyday
an tell wi fi pray
an tings wi get well
but wi still inna hell

wi aguh bun dung babylon

yuh tink a suh it aguh guh all de wile
year afta year
wi live inna fear
de yout dem caw get nuh wuck
dem a tun to garbage truk
while yuh buil up yuh mansion
an ave wi pon plantation
but mi a fiel slave
mi nuh knoo how fi behave

wi aguh bun dung babylon

yuh tink a suh it aguh guh all de wile
yuh ghey de yout dope
wile yuh pray to de pope
fi ghey yuh more time
fi commit more crime
but de same yout yuh dope
aguh teck it fi joke
an start a flame
not even yuh can tame

im aguh bun dung babylon

yuh tink a suh it aguh guh all de wile
dat wi a guh run
everytime yuh point yuh gun
an shoot one a wi
carelessly
one a dem nite
wen yuh tink tings airite
wen yuh a get yuh desire
yuh house a guh ketch a fire

wi aguh bun dung babylon

weil wi nuh tink a suh it aguh guh all de wile
yout a guh rise
an realize
dat de time is now
babylon mus bow
tings mus tun
fire mus bun
our freedom mus com

wi aguh bun dung babylon

Back to The Ultimate Collection